Shan e Ahle bait o sahaba | Ahle Haq ki Kia Pehchan hai ?blog By Mohsin Moten

ہم عاشقانِ رسول ﷺ ہیں۔ ہمیں اپنے ماں باپ سے بڑھ کر، اپنی اولاد سے بڑھ کر، اپنی جان سے بڑھ کر حضور نبی کریم ﷺ سے محبت ہے۔ یہ محبت صرف زبان تک محدود نہیں بلکہ ہمارے دل کی دھڑکنوں اور خون کی رگوں میں بسی ہوئی ہے۔

ہمیں اپنے آقا ﷺ کی ہر نسبت سے محبت ہے۔ ہمیں ان کے مبارک شہر سے محبت ہے، ان سے گزرنے والی ہواؤں سے محبت ہے، ان کے ذکر سے محبت ہے، ان کے نعلینِ مبارک سے محبت ہے، بلکہ ان نعلینِ مبارک سے مس ہونے والی مٹی سے بھی محبت ہے۔ ہمیں حضور ﷺ کے گھرانے سے محبت ہے، کیونکہ یہ وہ گھرانہ ہے جسے اللہ تعالیٰ نے عزت، طہارت اور برکت عطا فرمائی۔

جب ہمیں حضور ﷺ کے نعلینِ مبارک تک سے اتنی محبت ہے تو پھر ان کی آلِ پاک اور اہلِ بیتِ اطہار سے ہماری محبت کا عالم کیا ہوگا؟ ہمیں حضور ﷺ کی اولاد، ان کے اہلِ بیت اور ان کے مقدس گھرانے سے بے پناہ محبت ہے۔ ان کی محبت ہمارے خون کی رگوں میں دوڑتی ہے اور ہمارے ایمان کا حصہ ہے۔ جس دل میں اہلِ بیتِ اطہار کی محبت نہ ہو، وہ دل محبتِ رسول ﷺ کی حقیقی مٹھاس سے محروم ہے۔

اہلِ بیتِ اطہار میں امہات المؤمنین بھی شامل ہیں، جو پوری امت کی مائیں ہیں۔ ہمیں تمام ازواجِ مطہرات رضی اللہ عنہن سے بے حد محبت ہے۔ ہم ان مقدس ہستیوں کا ادب و احترام اپنے ایمان کا حصہ سمجھتے ہیں، کیونکہ وہ رسول اللہ ﷺ کے گھرانے کا حصہ اور امت کی مائیں ہیں۔

اور جس طرح ہمیں حضور ﷺ کی آلِ پاک سے محبت ہے، اسی طرح ہمیں حضور ﷺ کے صحابۂ کرام رضوان اللہ علیہم اجمعین سے بھی بے حد محبت ہے۔ وہ خوش نصیب ہستیاں جو ہر لمحہ حضور ﷺ کے ساتھ رہیں، خوشی اور غمی میں ساتھ رہیں، مکہ کے سخت ترین حالات میں ساتھ رہیں، شعبِ ابی طالب کی آزمائشوں میں ساتھ رہیں، ہجرتِ مدینہ کے سفر میں ساتھ رہیں، غارِ ثور کے لمحات میں ساتھ رہیں، اور میدانِ جہاد میں اپنی جانیں نچھاور کرنے کے لیے ہر وقت تیار رہیں۔

ہمیں سیدنا ابوبکر صدیقؓ، سیدنا عمر فاروقؓ، سیدنا عثمان غنیؓ، سیدنا علی المرتضیٰؓ اور تمام صحابۂ کرام رضوان اللہ علیہم اجمعین سے محبت ہے۔ یہ وہ مقدس جماعت ہے جس نے دین کی خاطر ہر قربانی دی اور اپنے آقا ﷺ پر اپنی جان، مال اور سب کچھ قربان کر دیا۔

اسی لیے نہ ہم اپنے نبی کریم ﷺ کی شان میں گستاخی برداشت کر سکتے ہیں، نہ اہلِ بیتِ اطہار کی شان میں کوئی بے ادبی سن سکتے ہیں، نہ امہات المؤمنین کے خلاف کوئی گستاخانہ کلمہ برداشت کر سکتے ہیں اور نہ ہی صحابۂ کرام رضوان اللہ علیہم اجمعین کے خلاف کوئی گستاخانہ بات برداشت کر سکتے ہیں۔

ہمارا عقیدہ، ہماری محبت اور ہمارا راستہ یہی ہے کہ ہم رسول اللہ ﷺ سے محبت کرتے ہیں، اہلِ بیتِ اطہار سے محبت کرتے ہیں، امہات المؤمنین سے محبت کرتے ہیں اور تمام صحابۂ کرام رضوان اللہ علیہم اجمعین سے محبت کرتے ہیں۔ یہی اہلِ حق کا راستہ ہے، یہی اہلِ اسلام کا راستہ ہے اور یہی محبتِ رسول ﷺ کا راستہ ہے۔

از قلم: محسن موٹن